الحمد لله والصلاة والسلام على رسول الله
اما بعد
عندنا
احنا المسلمين عيب شديد جدا اننا بنغلي لفترة على أي موقف ولكن بعدها
بنبرد واحدة واحدة وننسى ونعيش حياتنا من جديد وكان مفيش شئ حصل
فاكرين ازمة الرسوم الكاركاتورية بتاعة الدانمارك؟
ايه اللي حصل
هاج المسلمين في كل مكان في الارض
والمظاهرات طلعت في كل مكان
والعلما اتكلموا في كل مكان
لكن للاسف الشديد ولا اتاثرت الدانمارك بكده
ولا اصبحت عبرة لغيرها
يا ترى ليه
لان العالم القذر اللي احنا عايشين فيه ده ما بيفهمش الا لغة واحدة بس
هيا لغة القوة
طالما انت ضعيف يبقا لازم تكون تحت الرجلين ويداس فوق رقبتك بالاحذية
وكل مقدساتك وكل شعائرك لازم تهان هيا كمان
بس للاسف الشديد احنا ما كنا في يوم ضعاف ولا هنكون في يوم تحت الرجلين
اللي عمل فينا كده ان المسائل دي لا تهم السادة المسئولين صناع القرار في كل البلاد اللي مفروض انها اسلامية
اهتماماتهم
في حاجات تانية خالص اهم في نظرهم بكتير من مسالة اهانة الرسول صلى الله
عليه وسلم او التهديد بضرب الكعبة وغيرها من الموضوعات دي
اللي يهمهم مصالحهم وبس
فلوسهم اللي بيهتموتا انها تزيد لاكبر قدر ممكن اثناء فترة حكمهم
مناصبهم وازاي يحافظوا عليها
والاهم من ده ازاي ورثوها لولادهم بعد موتهم
انما قضية اهانة الرسول عليه الصلاة والسلام دي قضية مالهاش أي اعتبار
طب الكلام ده عند الحكام امال فين العلماء والمفتيين واقصد الرسميين اللي المفروض مهمتهم ارشاد الناس وتعليمهم امور دينهم
ليه ما اهتموش بكده وبقا لهم دور ايجابي؟
طبعا ممكن أي حد يسال ايه اللي فكرك بكده وقلب عليك المواجع
الاجابة اني مش انا والله اللي افتكرته لكن هما اللي فكرونا بيه تاني
في يوم 19 اغسطس 2007
طلعت صحيفة في السويد اسمها - نركيس أليهاندا-
نشرت صورة لرسام قذر اسمه - لارس فيلكس –
الصورة دي فيها صورة كلب براس انسان
عارفين الانسان ده مين اللي صورته على جسد كلب
وجه الانسان ده هوا رسم لخير خلق الله صلى الله عليه وسلم
وادي رابط البي بي سي عشان تقروا الموضوع
http://news.bbc.co.uk/hi/arabic/world_news/newsid_6969000/6969793.stm
اظن عرفتم الان ايه اللي فكرني
الكلاب وابناء الكلاب بيرسموا صورة للنبي على جسد كلب
بس العيب مش فيهم
العيب فينا احنا
العيب في المسئولين وصناع القرار اللي اشتروا دنياهم ونسوا اخرتهم
العيب في علماء السلطة في كل مكان اللي بيسكتوا عن اللي بيغضب اللي معينهم وبيقولو بس حسب التعليمات
العيب في شباب المسلمين اللي اتشغلوا بالفيديو كليب والموبايلات والتعارف بين الولاد والبنات ونسوا دينهم
العيب عندنا كلنا
محصلش في تاريخ الاسلام ان الرسول عليه الصلاة والسلام يتهان بالشكل ده الا في عهدنا احنا
في اليومين اللي احنا عايشين فيهم
لحد امتا هيفضل المسلمين ساكتين على الاهانات دي
الموضوع كده مش موقف فردي من صحفي
الدانمارك واهانتها وبعدين تصريحات البابا وبعدين رسوم السويد
الموضوع شئ جماعي مترتب له وبينفذوه بالتتابع
لحد
امتا الحكومات هتفضل محتفظة بالعقل والحكمة والدبلوماسية مع ناس لا بتفهم
بالعقل ولا بالحكمة في حين ان لو اتعرض البابا حتى لاي نقد تقوم الدنيا
ومتقعدش
ليه ؟
هوا عندهم اغلى من الرسول صلى الله عليه وسلم عندنا ؟
لحد امتا هتفضل الحكومات متصورة ان مصلحتها في عداوتها لشعوبها
مفيش حد من المسلمين ضد حكومته بس لازم يعيشوا معانا واقعنا ويهتموا بقضايانا والالم اللي احنا بنعانيه
يا سادة يا حكام المسلمين رؤساء وملوك وامراء وقادة وزعماء العالم الاسلامي
هل لا يستحق رسول الله منكم اهتمام بما يحدث له
هل لا يستحق اجتماع عاجل لجامعة الدول العربية من اجله هو فقط
هل لا يستحق اجتماع منظمة المؤتمر الاسلامي من اجله صلى الله عليه وسلم
هل لا يستحق وقفة رجال من اجل النبي الذي انقذنا الله به من الضلال
لا نريد منكم مناقشة قضايانا وآلمنا الان
جوعونا اقتلونا اسرقوا خيراتنا اعملوا اللي انتو عاوزينه ممكن نسامحكم فيه
انما مش ممكن نسامحكم ابدا على التخاذل ده في حق اطهر خلق الله
العجيب ان الحكومة الوحيدة اللي اعترضت بشكل رسمي هيا حكومة ايران
ليه ؟
هما مسلمين واحنا لا ؟
هما بيحبوا الرسول صلى الله عليه وسلم واحنا لا ؟
كلمة اخيرة
الحلول اللي فاتت اثبتت فشلها
عاوزين حلول تانية مش زي الحلول السابقة اللي اثبتت فشلها
مش عاوزين حد يتكلم باسم الاسلام والمسلمين ويستعطفهم ويقولهم بلاش تعملوا كده تاني عشان خاطرنا
يعني اللي كلمهم بالعقل وراح لهم واستعطفهم وكلمهم بالحسنى برضه فشل
دول ما بيعرفوش اللغة دي
عايزين لغة تانية
اتحركوا يا سادة اتحركوا واتركوا الكراسي قليلا
اتحركوا يمكن موقف زي ده يرضى الله به عنكم ويغفر لكم مامضى من سيئاتكم
اتحركوا واحنا معاكم
مستعدين نجوع مستعدين نعطش مستعدين نموت
مستعدين نواجه الدنيا كلها انتصارا لاحب خلق الله الينا
اتصرفوا واحنا معاكم
بس اتصرفوا مرة واقفوا وقفة رجالة واحنا معاكم
الجمعة سبتمبر 07, 2007 4:12 am
